Cənubi Koreyanın Ticarət və İnvestisiyaların Təşviqi Agentliyi (KOTRA), İNPRO, WHYBIZ, ENEY şirkətləri ilə “Koreya-Azərbaycan ağıllı kənd təsərrüfatı sahəsində əməkdaşlıq” çərçivəsində 11-14 dekabr tarixlərində şirkət əməkdaşları və texnikləri tərəfindən Heyvandarlıq Elmi Tədqiqat İnstitutunun (HETİ) yeni istifadəyə veriləcək olan “İribuynuzlu heyvandarlıq” kompleksində nəzarət kameralarının, habelə sistem nəzarətini həyata keçirmək üçün lazım olan avadanlıqların qurulmasının ilkin mərhələsi baş tutub. Bu mövzuda keçirilən tədbirdə Heyvandarlıq Elmi Tədqiqat İnstitutunun direktoru Mahir Hacıyev, Göygöl rayon İcra Hakimiyyəti Başçısının müavini Arzu Qocayev, həmçinin Cənubi Koreyanın Ticarət və İnvestisiyaların Təşviqi Agentliyi (KOTRA), İNPRO, ENEY şirkətlərinin rəhbərləri çıxışlar edib. Daha sonra koreyalı mütəxəssislər tərəfindən HETİ əməkdaşlarına sistem barədə təlimlər keçilib. Qeyd edək ki, qurulan sistem ilə məsafədən kompleksə və kompleksdə saxlanılacaq heyvanlara nəzarət mümkün olacaq.

Xatırladaq ki, cari ilin aprel ayından başlayaraq Cənubi Koreyanın Ticarət və İnvestisiyaların Təşviqi Agentliyi (KOTRA) ilə müxtəlif layihələrin həyata keçirilməsi məqsədilə mütəmadi görüşlər keçirilib. 19.09.2023-cü il tarixində isə Heyvandarlıq Elmi Tədqiqat İnstitutunda Kənd Təsərrüfatı Nazirliyinin dəstəyi, Cənubi Koreyanın Ticarət və İnvestisiyaların Təşviqi Agentliyi (KOTRA), İNPRO, WHYBIZ, ENEY şirkətlərinin nümayəndələri ilə “Koreya-Azərbaycan ağıllı kənd təsərrüfatı sahəsində əməkdaşlıq” mövzusunda sınaq layihəsinin təqdimatı baş tutub.