Türkiyə Kənd Təsərrüfatı və Meşə Nazirliyi və Türkiyə Damazlıq İribuynuzlu Mal-qara Yetişdiriciləri Mərkəz Birliyinin birgə təşkilatçılığı ilə 7-11 mart 2022-ci il tarixlərində "Şəcərə, ilkin şəcərə və döl kampaniyasının idarə edilməsi (Genomik seleksiya)" layihələri çərçivəsində Antalyanın Kəmər rayonunda, Limak Limra Hoteldə "XIV Şəcərə, ilkin şəcərə və döl kampaniyasının idarə edilməsi - illik layihə qiymətləndirmə və təlim toplantısı" keçirilib.
Türkiyə Respublikası Kənd Təsərrüfatı və Meşə naziri prof, dr. Vahit Kirişcinin, Türkiyə Respublikası Kənd Təsərrüfatı və Meşə Nazirliyinin Heyvandarlıq Baş İdarəsinin səlahiyyətli nümayəndələrinin, heyvandarlıq birlik və dərnəklərinin əməkdaşlarının, ekspert və mütəxəssislərin də iştirak etdiyi tədbirdə heyvanların şəcərə və ilkin şəcərə sistemlərinin hazırlanması istiqamətində görülən işlər, dölvermə prosesinin idarəedilməsi layihələri, genomik seleksiya, heyvanların saxlanması və yetişdirilməsi, bu sahəyə dövlət dəstəyi, qanun layihələri, hüquqi sənədlər və s. mövzular geniş müzakirə edilib.
Azərbaycan Respublikası Kənd Təsərrüfatı Nazirliyi ilə Türkiyə Respublikası Kənd Təsərrüfatı və Meşə Nazirliyi arasında olan əməkdaşlığa əsasən sözügedən tədbirə Kənd Təsərrüfatı Nazirliyinin "Heyvandarlığın təşkili və monitorinqi" şöbəsinin müdiri Eldar Həsənov və nazirliyin Heyvandarlıq Elmi Tədqiqat İnstitutunun direktoru Mahir Hacıyev də dəvət ediliblər. Eldar Həsənov çıxışı zamanı iki dost və qardaş ölkə arasında bütün sahələrdə olduğu kimi kənd təsərrüfatı sahəsində də əməkdaşlığın olduğunu bildirib və bu istiqamətdə aparılan işlər barədə məlumat verib. O, bu sahədə əməkadşlığın əhəmiyyətini vurğulayıb və gələcəkdə də əlaqələrin davam edəcəyini bildirib. Heyvandarlıq Elmi Tədqiqat İnstitutunun direktoru Mahir Hacıyev də öz məruzəsində iki dövlətin elmi tədqiqat müəssisələri və qurumları arasında qurulan elmi-texniki əməkdadşlıqdan, aparılan bilik və təcrübə mübadiləsindən, ortaq maraqlardan, birgə icra edilən layihələrdən və əldə edilən nailiyyətlərdən bəhs edib. İnstitutun fəaliyyət istiqaməti, elmi tədqiqat sahəsində görülən işlər və qazanılan uğurlar barədə təqdimat nümayiş etdirib.