12 noyabr 2025-ci il tarixində Cənubi Koreyanın Azərbaycandakı səfiri Kanq Kımqu və rəhbərlik etdiyi nümayəndə heyəti Heyvandarlıq və Balıqçılıq Elmi-Tədqiqat İnstitutuna rəsmi səfər edib. İnstitutun direktoru Mahir Hacıyev qonaqlara Cənubi Koreyanın “Inpro”, “WhyBiz” və “ENEY” şirkətləri ilə icra olunan birgə layihələr və müasir sürü idarəetmə sistemləri barədə məlumat verib.

Görüşdə kadr hazırlığı, təcrübə mübadiləsi və birgə elmi-tədqiqat layihələrinin həyata keçirilməsi perspektivləri müzakirə olunub. Səfir Kanq Kımqu əməkdaşlığın möhkəmləndirilməsi üçün lazımi dəstəyin göstəriləcəyini vurğulayıb. Səfər çərçivəsində nümayəndə heyəti institutun heyvandarlıq kompleksi, mərkəzi server otağı və müasir laboratoriyaları ilə yaxından tanış olublar.